Nuk kanë fund problemet për skuadrën e Luftëtarit. UEFA ka nisur një hetim për klubin gjirokastrit për dy ndeshjet që bluzinjtë zhvilluan në Europa League ndaj Ventspils.
UEFA i ka dërguar një shkresë Federatës Shqiptare të Futbollit ku e njofton se Luftëtari po hetohet për dy ndeshjet kundër letonezëve në Europa League.
Bluzinjtë e humbën ndeshjen e parë me shifrat e thella 5-0, me golat të cilët u shënuan vetëm në pjesën e parë. Ndërkohë, ajo që ngjall më shumë dyshime është takimi i kthimit që u zhvillua në “Elbasan Arena”, i cili përfundoi 3-3, ku përmbysjet dhe ripërmbysjet e rezultatin ishin konstante.
Sistemi BFDS (sistemi kompjuterik i UEFA-s që shërben për zbulimin e manipulimit të ndeshjeve) sinjalizoi luhatje e çuditshme dhe për këtë motiv ka nisur edhe ky proces.
Nisur nga ky hetim klubi i Luftëtarit nuk ka marrë edhe fondi e UEFA-s prej 240 mijë eurosh, i cili është “ngrirë”. Në këtë sezon bluzinjtë kanë vuajtur mungesën e financave dhe kjo për shkak se nuk kanë marrë fondin që prisnin nga UEFA.